بازار ہے پتھر ہیں زینب کا کھلا سر ہے

عارفانہ کلام منقبت سلام مرثیہ نوحۂ کربلا

بازار ہے پتھر ہیں زینب کا کُھلا سر ہے

ہر زخم پہ شُکرانہ زینبؑ کے لبوں پر ہے

اک گریہِ خونیں کی جاتی ہی نہیں لالی

سجادؑ کی آنکھوں کو دیکھا ہی نہیں خالی

یا خون ہے آنکھوں میں یا شام کا منظر ہے

وہ قلب تھے کیسے جو جاں لے گئے سرور کی

پتھر تو وہ ہے جس نے پتھر کی حیا رکھی

اے سنگِ حلب تجھ کو کیسے کہوں پتھر ہے

لٹکا درِ کُوفہ پر دیکھا ہے کوئی لاشہ

کیوں چوب سے محمل کی زینبؑ نے ہے سر مارا

اے وقت! لہو سے کیوں زینبؑ کی جبیں تر ہے

جو بڑھ کے ہر اک دُرا خود پُشت پہ کھاتی ہے

خود خوں میں نہاتی ہے، زینبؑ کو بچاتی ہے

ہاں یہ ہے وہی فِصّہ قنبر کی جو ہمسر ہے

یہ شورِ بُکا کیا ہے؟ ماتم کی صدا کیا ہے؟

توحید بچائے جو وہ کرب و بلا کیا ہے؟

یا ہے سرِ سرورؑ یا زینبؑ تیری چادر ہے

کیوں ہائے حسینا کا اک شور سا اٹھتا ہے

سر غازی کا نیزے سے کیوں خاک پہ گرتا ہے

غازی کی بہن شاید بلوے میں کُھلے سر ہے

لے شامِ غریباں سے پُر ہول بیاباں تک

بازار سے کُوفہ تک دربار سے زِنداں تک

بے رحم طمانچے ہیں اور شاہ کی دختر ہے

مقتل نے خدا جانے کیا چھین لیا اس کا

اک ہاتھ کلیجے پر رہتا ہے دھرا جس کا

لگتا ہے مجھے شاید یہ مادرِ اکبرؑ ہے

ٹکراتی ہے سر اپنا جائے تو کہاں جائے

معصوم سکینہؑ کو غش آئے کہ موت آئے

اس کیلئے زنداں میں بس خاک کا بستر ہے

اک کرب و بلا اول، اک کرب و بلا آخر

کہتے ہیں نویدؔ اس کو شبیرؑ جو ہے ظاہر

اور جو پسِ پردہ ہے وہ زینبِؑ مضطر ہے

احمد نوید