سکوت شام سے پہلے یہ شور ہے کیسا

 سکوتِ شام سے پہلے یہ شور ہے کیسا

ہمارے نام سے پہلے یہ شور ہے کیسا

فنا کے نام سے سہما ہوا ہے سارا جہاں

بقا کے جام سے پہلے یہ شور ہے کیسا

غزل کے شعر سا لہجہ لبھاونی باتیں

وفا کے دام سے پہلے یہ شور ہے کیسا

ذرا سی بات کا چرچا یہ غلغلہ ہر سُو

کہو کہ کام سے پہلے یہ شور ہے کیسا

ابھی تو آمدِ گُل کا بھی وقت آیا نہیں

تو احترام سے پہلے یہ شور ہے کیسا

تمہیں کہو یہ جہاں ختم ہو رہا ہے تو پھر

نئے نظام سے پہلے یہ شور ہے کیسا

امیر شہر ہے واقف، کہ کیا سناؤں گا

مِرے کلام سے پہلے یہ شور ہے کیسا

یہاں تلک تو بہت محترم تھے رشتے مگر

اب اس مقام سے پہلے یہ شور ہے کیسا

خبر نہیں کہ ہے دائم سکوں کسے حاصل

تو پھر دوام سے پہلے یہ شور ہے کیسا

ہوائیں کہتی ہیں اسرار منتظر ہے کوئی

مِرے قیام سے پہلے یہ شور ہے کیسا

علیم اسرار