درون خواب وہ رشک بہار آتا ہے

 درونِ خواب وہ رشکِ بہار آتا ہے

تو چشمِ دل میں عجب سا خُمار آتا ہے

حسین آنکھیں ہمیشہ حسیں نہیں لگتیں

نگاہِ ناز سے دیکھیں تو پیار آتا ہے

بچھڑنے والوں کو رُخصت کیا سہولت سے

وہ اس لیے کہ ہمیں انتظار آتا ہے

تُو کہہ رہی ہے مِرے دُکھ تُو چُن کے مارے گی

بتا! ستاروں کا تجھ کو شُمار آتا ہے؟

ہوائے یاد سے وابستہ ہے غبارِ اشک

ہوا نہیں بھی چلے تو غُبار آتا ہے

کسی صِلے کے بِنا ہی تجھے محبت دی

تِری طرف یہ ہمارا اُدھار آتا ہے

عبید ثاقب