نیرنگیٔ شباب پہ دل ہارنا پڑا

 نیرنگیٔ شباب پہ دل ہارنا پڑا

اک اک کُھلی کتاب پہ دل ہارنا پڑا

اپنے بدن کی دھوپ لٹانی پڑی اسے

سورج کو ماہتاب پہ دل ہارنا پڑا

دنیا کے رنگ و نور کا حصہ تھا ایک شخص

دنیا کی آب و تاب پہ دل ہارنا پڑا

سانسوں کی سرخ پیاس مٹانے کے واسطے

پیاسے کو اک حباب پہ دل ہارنا پڑا

مجھ سے بھی ایک شخص کی آنکھیں لپٹ گئیں

مجھ کو بھی اک جناب پہ دل ہارنا پڑا

بن کر دھواں ہواؤں میں اڑنا پڑا مجھے

قُلزم کو آفتاب پہ دل ہارنا پڑا

گو جیت کی تلاش میں نکلا تھا میں مگر

اک خانماں خراب پہ دل ہارنا پڑا

دامِ فریبِ رنگ میں آ کر بصد خوشی

تتلی کو اک گلاب پہ دل ہارنا پڑا

محفل میں اس کی لاج تو رکھنی تھی اس لیے

اس کے ہر اک جواب پہ دل ہارنا پڑا

پھرتا ہوں عمر بھر کی اذیت لیے ہوئے

کیوں حسنِ بے حساب پہ دل ہارنا پڑا

صائم نشانِ راہ دِکھانا تھا اس لیے

صحرا کو اک سراب پہ دل ہارنا پڑا

عبدالباسط صائم