غموں کی دھوپ کا جب بھی بیان لکھتا ہوں
تو زلفِ یار کو میں سائبان لکھتا ہوں
مکین تم ہو جو اس دل کے تو مبارک ہو
تمہارے نام یہ دل کا مکان لکھتا ہوں
جسے خیال کی رفعت بلند کرتی ہے
میں اس زمین کو بھی آسمان لکھتا ہوں
اسی کے درد نے جینا سکھا دیا مجھ کو
ستم شعار کو بھی مہربان لکھتا ہوں
یہی وسیلہ ہی کافی ہے میری بخشش کو
علم کے سائے کو اپنی امان لکھتا ہوں
کرم یہ خالقِ اکبر کا مجھ پہ کم تو نہیں
قلم سے آل محمدﷺ کی شان لکھتا ہوں
جو پتھروں کو تکلم عطا کرے عابد
میں اپنے شعروں میں ایسی زبان لکھتا ہوں
علی عابد
No comments:
Post a Comment