رنگ نما
ہم نے بستر پہ گڑیوں کے نوحے سنے
جن کو اُترن کی ترغیب کافی نہیں
ہم نے ٹُوٹے کھلونوں کی آنکھیں پڑھیں
جن کے مجرم کی کوئی معافی نہیں
آہنی دل کی تاریخ پڑھتے ہوئے
ہم نے کتنی مُدوِّن کتابیں پڑھیں
خون ہی خون تھا خونی بُرجوں تلے
کوئی کیسے چلے؟
شعبدہ باز تھا، چاند گہنا دیا
جس نے پریوں کے غم کو بڑھاوا دیا
ایک شودر نے اگنی کے پھیرے لیے
اور پربت کی رانی کو جھانسہ دیا
بے تحاشہ دیا
خواب بھی جس کی حالت پہ ہنستا رہا
وہ جو خالی جہانوں میں بستا رہا
اس کے خوابوں کو مٹی میں چنوا دیا؟
اب تو خوش ہو کہ شاعر کو ٹھکرا دیا
خود کو دھوکہ دیا
راہبوں کی زبانوں پہ تالے پڑے ہونٹ کالے پڑے
بھیک میں بھوک ہڑتال ملتی نہیں کال ملتی نہیں
ایک نِردھن کا بَن باس کس کام کا
پاپ کا تاپ شِکشا سے اترا کبھی
میل گنگا نہانے سے دُھلتا نہیں
بھید کُھلتا نہیں
چند دامن میں کچلی ہوئی تتلیاں
بالکونی سے ہٹتی ہوئی انگلیاں
راہداری میں پلو اٹکتا ہوا
من چٹختا ہوا
دور کی جیل سے نیند کی بیڑیاں کھینچ لاتے نہیں
خواب تکتے نہیں، دُکھ کماتے نہیں
زخم کھاتے نہیں
آنکھ بہتے ہوئے جھیل ہو جائے گی
اون مخمل میں تبدیل ہو جائے گی
ریت مٹی میں تحلیل ہو جائے گی؟
خواب کے جنگلوں میں بھٹکتے رہو
زہر چکھتے رہو
حنا عنبرین
No comments:
Post a Comment