جہان بھر کی حکومتوں سے نوازتا ہے

عارفانہ کلام حمدیہ کلام

جہان بھر کی حکومتوں سے نوازتا ہے

وہ اپنے بندوں کو عظمتوں سے نوازتا ہے

اسی کی دھرتی، فلک بھی اس کا وہ سب کا خالق

وہ ان گِنت اپنی نعمتوں سے نوازتا ہے

ہر ایک شے پہ محیط ہے اس کی حکمرانی

رحیم آقا ہے، رحمتوں سے نوازتا ہے

ہو جس زمیں پہ نظام اس کا، کلام اس کا

وہ اس زمیں کو صباحتوں سے نوازتا ہے

ہے ذکر اس کا سکونِ قلب و نظر کا باعث

وہ بے سکونی میں راحتوں سے نوازتا ہے

وہی خدا ہے، ازل بھی اس کا ابد بھی اس کا

ہمیشہ اپنی محبتوں سے نوازتا ہے

وہ جانتا ہے، جو سامنے ہے جو غیب میں ہے

ہمیں بھی آصف وہ حکمتوں سے نوازتا ہے

آصف راز