پہلے تو میرا رقص سرِ دار دیکھنا
پھر یہ کہ پھر نوشتۂ دیوار دیکھنا
آنکھوں میں کھنچ کے رہ گئی تصویرِ ہجرِ یار
لائی ہے رنگ، حسرتِ دیدار دیکھنا
گردن میں طوق پاؤں میں بیڑی پڑی ہوئی
مقتل میں آ رہے ہیں گنہگار دیکھنا
زنداں میں روز و شب کے مشاغل نہ پوچھیے
در دیکھنا کبھی، کبھی دیوار دیکھنا
میں کیا کروں کہ میرا مقدر ازل سے ہے
تیرہ شبی میں صبح کے آثار دیکھنا
ہم اہلِ دل کو کوئے ملامت میں دوستو
دیکھا نہ جا سکے تو سرِ دار دیکھنا
خالد علیگ
No comments:
Post a Comment