ہر چند ترے غم کا سہارا بھی نہیں ہے

 ہر چند ترے غم کا سہارا بھی نہیں ہے

جینے کے علاوہ کوئی چارا بھی نہیں ہے

ہر روز کیے جاتی ہے یہ زیست تقاضے

کیا قرض تھا جو ہم نے اتارا بھی نہیں ہے

پہلے تو یہ موجیں بھی حمایت میں کھڑی تھیں

اب میرا مددگار کنارا بھی نہیں ہے

جاتا بھی نہیں چھوڑ کے وہ مجھ کو اکیلا

اور ساتھ مِرا اس کو گوارا بھی نہیں ہے

کچھ اپنے مقدر کو بگاڑا بھی ہمیں نے

کچھ اپنے موافق یہ ستارا بھی نہیں ہے

ہوتی تھی جسے دیکھ کے سرشار طبیعت

آنکھوں میں وہ سر سبز نظارا بھی نہیں ہے

یہ بات الگ جیت کے آثار نہیں ہیں

اس معرکۂ جاں کو وہ ہارا بھی نہیں ہے

ہر کوئی سلیم اس کا مخالف ہے جہاں میں

اور کوئی خلاف اس کے صف آرا بھی نہیں ہے

سلیم فراز