دِیوں پر لکھی ہے عبارت ہوا کی
کہ تاریکیاں ہیں شرارت ہوا کی
بُجھے دِیپ پر بیٹھ کر ایک جگنو
ہوا کر گیا سب حقارت ہوا کی
مدینے کو جانا، مدینے سے آنا
حقیقت میں یہ ہے طہارت ہوا کی
چہکنے لگے ہیں اندھیرے یونہی کیا
انہیں مل چکی ہے بشارت ہوا کی
اگر وقت ہو قیس تو دشت میں ہم
ذرا کر کے آئیں زیارت ہوا کی؟
بُجھا کے دِیا، پھر گِرا بھی دیا ہے
ارے، اتنی جرأت، جسارت ہوا کی
جلائے بھی خود ہی بُجھائے بھی خود ہی
سمجھ ہی نہ آئے بُجھارت ہوا کی
کہاں بُھولتی ہیں دِیؤں کو وہ راتیں
انہیں یاد ہے قتل و غارت ہوا کی
کرو کوئی قندیل روشن کہیں بھی
ذرا دیکھیۓ پھر بصارت ہوا کی
مساموں سے آنسو نکلنے لگے تھے
گِری حبس سے جب عمارت ہوا کی
سرِ دشت مجنوں کی شہ پر مسلسل
جنوں کر رہا ہے تجارت ہوا کی
وہیں پھر مہک نے بصارت عطا کی
جُدائی نے جو تھی بصارت ہوا کی
ارے دشت کے چاک پر یہ بگولے
یہ کوزہ گری، یہ مہارت ہوا کی
مظہر الحق
No comments:
Post a Comment