شب کے زندان میں گونجا جو اک آوازۂ خواب
چشمِ بے خواب نے وا کر دیا دروازۂ خواب
رت جگے نیند دریچوں میں تھے آسودۂ شب
مسندِ شب پہ بکھرتا رہا شیرازۂ خواب
ماند پڑنے لگا پیراہنِ مہ تاب کا رنگ
عارضِ صبح پہ جب شب نے مَلا غازۂ خواب
چُھو نہ پایا حدِ تعبیر کوئی خواب مِرا
صورتِ منظرِ بے رنگ ہے خمیازۂ خواب
صبح دم دیکھتا ہے جب مِری پُر خواب آنکھیں
آنکھ کے تل سے لگاتا ہے وہ اندازۂ خواب
بوجھ نیندوں کا اٹھائے ہوئے بوجھل آنکھیں
دستکیں دیتی ہیں، کُھلتا نہیں دروازۂ خواب
عرصۂ خواب ہُوا ختم کہ وہ شخص گیا
میری آنکھوں سے لگاتا تھا جو اندازۂ خواب
پروین حیدر
No comments:
Post a Comment