میرے ہونٹوں پہ جو توصیف و ثنا ہے مولا

عارفانہ کلام حمدیہ کلام

میرے ہونٹوں پہ جو توصیف و ثنا ہے مولا

یہ بھی ایک تیری ہی بخشش کی ادا ہے مولا

مرغزاروں میں لیے پھرتی ہے خوشبو مجھ کو

مِری رگ رگ میں تِری بوئے سخا ہے مولا

ہو کے تیرا بھی تِرے گھر سے ہے دوری اتنی

زندگی میرے لیے ایک سزا ہے مولا

میرے جینے میں کوئی دخل نہیں ہے میرا

میری تو زیست فقط تیری رضا ہے مولا

میں تو نا چیز ہوں ادنٰی سا گدا ہوں تیرا

جو بھی ہے پاس مِرے تیری عطا ہے مولا

اس کو بھی اذن ملے دِیں پہ فدا ہونے کا

سر بکف راسخِ آشفتہ نوا ہے مولا

راسخ عرفانی