میرے عجیب خواب ہیں
سوموار کو مر جاؤں
کوئی چُھٹی نہ کر سکے
جنازہ کم ہو
میرے عجیب خواب ہیں
چھ تک گنتی گِنوں اور
سات کی جگہ تمہارا نام لوں
میرے عجیب خواب ہیں
خدا کے نام پہ چندہ مانگوں، اور
مسجد سے اونچا گھر بناؤں
میرے عجیب خواب ہیں
چُپ رہ کے وحشت میں ایسی چیخیں ماروں
کہ “دائیں بائیں” والوں کے کان پھٹ جائیں
میرے عجیب خواب ہیں
ساتھ منٹ تک سانس روک کے رکھوں
پھر اچانک سانس لے کر
فرشتے کو “بے بسی” کا مطلب سمجھاؤں
میرے عجیب خواب ہیں
بروزِ محشر مجھے
سکول کے رول نمبر سے پُکارا جائے
میرے عجیب خواب ہیں
دوزخ کی دیوار پہ بیٹھ کے نُصرت سنوں
بہشتیوں کو ترستے ہوئے دیکھوں
میرے عجیب خواب ہیں
سہیل کاہلوں
No comments:
Post a Comment