چاند چہرہ آس کا جلتا دیا کچھ بھی نہیں

 چاند چہرہ، آس کا جلتا دِیا کچھ بھی نہیں

منزلِ شب کی مسافت کا صِلہ کچھ بھی نہیں

آگ میں نخلِ تمنا ڈھونڈنا بے سُود ہے

دشت میں ظالم بگولوں کے سوا کچھ بھی نہیں

وہ مِلا بھی تو مِری تنہائیاں بڑھ جائیں گی

حسنِ کم آمیز سے شکوہ گِلہ کچھ بھی نہیں

جو بچھڑ جائیں انہیں دل میں بسانے کا صِلہ

اک الم آمیز راحت کے سوا کچھ بھی نہیں

جس کی لذت کی طلب بے حال رکھتی تھی مجھے

دوستو! اس جوئے شیریں میں بچا کچھ بھی نہیں

آئینہ اور حسن ایسے لازم و ملزوم ہیں 

ایک ہٹ جائے تو گویا دوسرا کچھ بھی نہیں

رانا غضنفر عباس