جو تو نے لوٹنے کا فیصلہ کیا مرے دوست

 جو تُو نے لوٹنے کا فیصلہ کیا مِرے دوست

تو پھر بتا کہ تِرے پاس کیا رہا مرے دوست

میں روتا چیختا تجھ کو پکارتا ہی رہا

یہ ویسے خواب تھا لیکن میں ڈر گیا مرے دوست

میں اس پہ آج بھی اک پھول رکھ کے آتا ہوں

وہ ایک بنچ جہاں تُو مجھے ملا مرے دوست

تُو مجھ سے پوچھے بِنا سانس تک نہ لیتا تھا

تو پھر یہ فیصلہ خود کیسے کر لیا مرے دوست

یہ سیٹی ریل کی تم کو سنائی دیتی ہے

بچھڑنے والا کہیں ہو نہ چیختا مرے دوست

میں زندگی سے بھی مایوس ہونے والا تھا

پھر ایک دن تُو کہیں مجھ سے آ ملا مرے دوست

میں ایک بار محبت میں ساتھ چلتا ہوں

سو آج سے مرے رستے ہیں سب جدا مرے دوست

میں اس کی خاک کو آنکھوں کا نور مانتا ہوں

وطن یہ میرا بھی ہے ارضِ کربلا مرے دوست

آفاق خالد