اندر کے زخم صورتِ قندیل جلتے ہیں
دل کے پھپھولے رخصتی پر ہاتھ ملتے ہیں
سورج کی مِثل کب ہیں شعاع زاد وہ وجود
اجسامِ نور وہ جو دعاؤں میں ڈھلتے ہیں
وحشت مزاجی تنہا شعاری کے روگ میں
جو مبتلا ہوئے، وہ کہاں پھر سنبھلتے ہیں
رختِ سفر جو باندھیں تو پتھر مزاج لوگ
آنگن کی اک جدائی میں کتنا پگھلتے ہیں
اس کی جدائی بانٹ گئی ہے وجود کو
لکھتے ہیں شعر گاہ کبھی خون اُگلتے ہیں
وہ ریشمی وجود گلابوں کی آبرو
وہ جس بدن میں رنگ شفق کے مچلتے ہیں
خاور وہ چشم سحر کی مانند چھا گئی
ہم نشۂ وجود سے باہر نکلتے ہیں
مرید عباس خاور
No comments:
Post a Comment