ہمارے لیے تو یہی ہے کہ
تمہارا جلوس جب شاہراہ سے گزرے
تو تم اپنی انگلیوں کی تتلیاں ہماری جانب اڑاؤ
اپنی انگلیوں کو ہونٹوں سے چھوتے ہوئے
ہماری جانب ایک بوسے کی صورت اچھالو
جسے سمیٹنے کے لیے ہم ایک ساتھ لپکیں
ہمارے لیے تو یہی ہے کہ
تمہارا لباس ہم پر مہربان ہو جائے
تم اپنی بگھی سے اترتے ہوئے
اپنے پائنچے انگلیوں سے سمیٹ لو
اور تمہارا سینڈل
تمہارے ٹخنے کی پہریداری سے غافل ہو جائے
یا ہوا تمہارے بالوں کو لہرا دے
اور تم انہیں سمیٹنے کی کوشش میں
اپنا نصف بازو برہنہ کر ڈالو
یا آسمان پر کوئی پرندہ دیکھتے ہوئے
تمہارے ہونٹوں پر آنے والی مسکراہٹ
ہماری آنکھوں سے اتفاقی ملاقات کر لے
کاشف رضا
No comments:
Post a Comment