اک بار پھر کہو ذرا

گیت

 اک بار پھر کہو ذرا

کہ میری ساری کائنات

تیری اک نگاہ پر نثار ہے

میری تیرہ زندگی کا نور تُو 

جنت ارضی میں رشک حور تُو 

لذت جاں راحت قلب حزیں 

عشرت نظارہ مہ وش مہ جبیں 

اک بار پھر کہو ذرا

کہ تُو بہت حسین ہے 

نگاہ میں شباب کا خمار ہے 

شرم کے پردے میں پنہاں شوخیاں 

مسکراہٹ میں نہاں سو بجلیاں 

ہر ادا تیری مجھے مرغوب ہے 

دہر کی ہر چیز سے محبوب ہے 

اک بار پھر کہو ذرا

کہ پیکر فانی ہے کیا 

کہ دل تو تیری روح پر نثار ہے 

جسم فانی حسن بھی فانی میرا 

جزبہ دل لیکن ہے لافانی میرا 

مرد ہرجائی ہے ہر گُل پر نثار 

دل مگر دیتی ہے عورت ایک بار 

اک بار پھر کہو ذرا

کہ مجھ کو غیر کا خیال

توبہ توبہ بس ناگوار ہے 

میں وہی ہوں میں بدل سکتی نہیں

دوسرے سانچے میں ڈھل سکتی نہیں 

اب تیرے تیور تیرے طور اور ہیں 

میں کہاں اب قابل غور اور ہیں 

اک بار پھر کہو ذرا

کہ میرا عشق مہر اور ماہ سے زیادہ پائیدار ہے 

میرے سر کی جھوٹی قسمیں کیا ہوئیں

ظاہری الفت کی رسمیں کیا ہوئیں 

گریہ پیہم و الجھن کیا ہوئی 

سانس کی تیزی وہ دھڑکن کیا ہوئی

اک بار پھر کہو ذرا

کہ میرا عہد استوار روح سے زیادہ استوار ہے 

باندھ کر عہد وفا توڑا تو کیا

شیشہ دل توڑ کے جوڑا تو کیا

سب سمجھتی ہوں مگر معذور ہوں 

دل کی اس فریاد سے مجبور ہوں

اک بار پھر کہو ذرا

کہ میری ساری کائنات

تیری اک نگاہ پر نثار ہے

سجاد سرور نیازی