نالہ سیلابِ نار گریہ ہے

 نالہ سیلابِ نارِ گریہ ہے

آہ پروردگارِ گریہ ہے

آدمیت حصارِ گریہ ہے

یعنی تارِ مدارِ گریہ ہے

طرہ بردوش شمعِ ہستی سے

موم گرتا فشارِ گریہ ہے

عہدِ آئندہ خوابگاہِ عروس

عمرِ رفتہ غبارِ گریہ ہے

عارضِ نو دمیدہ پر شبنم

زخمہ یابِ تتارِ گریہ ہے

رقصِ آہوئے شوقِ آوارہ

پیشِ روئے مزارِ گریہ ہے

طاسکِ سرنگوں کی پہنائی

مثلِ کف خواستگارِ گریہ ہے

آتشِ شعلہ ور کی نیرنگی

لالہ زارِ بہارِ گریہ ہے

سازِ بلبل ہے زمزمہ انداز

نغمہ کارِ فگارِ گریہ ہے

عہدِ نو میں ہر ایک چہرے پر

منسلک اشتہارِ گریہ ہے

بالِ طاؤسِ مردمِ دائم

سر بسر زیرِ بارِ گریہ ہے

غلام مصطفیٰ دائم