مقام نور ازل ہے زمان رحمت ہے

 عارفانہ کلام حمد نعت منقبت

مقامِ نورِ ازل ہے زمانِ رحمت ہے

حضورؐ آپ کا اسوہ جہانِ رحمت ہے

سخن وحی سے جڑا ہے ادا ہے خوشبو کی

حریمِ غنچہ دہن میں زبانِ رحمت ہے

مہکتی سانس میں زمزم بھری طراوت ہے

سبیلِ پیاس کا ضامن دہانِ رحمت ہے

بتوں کو توڑ کے آئے صنم کدوں کے رہین

حضور پاکﷺ کی دعوت اذانِ رحمت ہے

نفس نفس میں پرویا مہک رہا ہے بدن

یہ ذکر اسمِ محمدﷺ نشانِ رحمت ہے

اسی کے نور سے روشن جمالِ شمس و قمر

نظر نظر میں وہی کہکشانِ رحمت ہے

انہی کی یاد میں شیدا سکوں ہے سایہ فگن

اسی میں عمر گزاروں مکانِ رحمت ہے

علی شیدا