ہوا جانتی ہے
نار کو نور
تعصب کو مساوات لکھو
عہدِ ابلیس کو آدم کی فتوحات لکھو
خود کشی قتل کو
چیخوں کو مناجات لکھو
لبِ گویا کی جزا سلسلۂ طوق لکھو
جھوٹ لکھنا ہے مؤرخ! تو بصد شوق لکھو
گُرگِ شب زاد کے حیلوں کو یہ پہچانتی ہے
حاشیہ متن میں کتنا ہے، ہوا جانتی ہے
وقت اقلیم تھا جن کی وہ سبک سار ہوئے
جانے کس نیند کے ہنگام سے دو چار ہوئے
اب جو کروٹ پہ زمانے کی پڑے جلتے ہیں
حُرمتِ درد کے رشتے میں پروئے ہوئے لوگ
زخمِ ادراک کا سرمایہ لیے چلتے ہیں
جن کا منصب نہ ٹھکانہ، نہ نسب ہے کوئی
جن کے چہرے ہیں تواریخ کےگم گشتہ ورق
سدرۃالعشق کی پُر پیچ مُسافت میں جنہیں
یاد بھی ایک سی تہمت ہے، فراموشی بھی
(زندگی اہلِ تأسف پہ ہی موقوف نہیں)
ناہید قمر
No comments:
Post a Comment