اک نظر پیار کی ادھر کر دے

اک نظر پیار کی ادھر کر دے

تُو مکمل مِرا سفر کر دے

رُوح کی تشنگی مٹانے کو

اپنی چاہت سے تر بہ تر کر دے

میں مسافر بنوں مدینے کا

مجھ پہ رحمت کی اک نظر کر دے

وقتِ رُخصت ہے دید کی خواہش

کوئی جا کر انہیں خبر کر دے

اپنے ہاتھوں سے پھینک دو خنجر

سامنے خم کوئی جو سر کر دے

شاہ کوئی ہو یا گدا کوئی

تُو جسے چاہے معتبر کر دے

چاہتا ہے سکونِ دل جو تقی

خواہشیں اپنی مختصر کر دے

تقی ککراوی