پھر نہ کہنا تری محفل میں کہاں بیٹھ گیا

 پھر نہ کہنا تِری محفل میں کہاں بیٹھ گیا

آگ لگ جائے گی دیوانہ جہاں بیٹھ گیا

عشق سُولی پہ چڑھانے کے لیے لایا گیا

یہ تماشا تھا جہاں میں بھی وہاں بیٹھ گیا

یوں تو جانیں بھی گئیں کتنی وبا سے لیکن

شہر کا گرد و غبار اور دھواں بیٹھ گیا

تجھ سے بڑھ کر ہے یقیں تیری وفاؤں پہ مجھے

دل میں کیوں تجھ سے بچھڑنے گماں بیٹھ گیا

اشک دریا کی طرح بہنے لگے آنکھوں سے

دل کی دیواریں گریں سارا مکاں بیٹھ گیا

پانیوں پر تِری تصویر بناتے رہنا

میرے ہاتھوں میں عجب کارِ زیاں بیٹھ گیا

چشمِ ساقی سے مگر کوئی نہ محروم رہا

اس کی نظروں میں رہا جو بھی جہاں بیٹھ گیا

اس کی فریاد فہیم آج بھی ٹھہری بے سُود

عندلیب آج بھی کر کر کے فغاں بیٹھ گیا

محمد فہیم