رہبر کی آدمی کو ضرورت نہیں رہی

 جب قابلِ یقینِ سیاست نہیں رہی

رہبر کی آدمی کو ضرورت نہیں رہی

رکھتے کہاں خیال ہیں جی اب کسی کا ہم

اتنی بھی پاس اپنے تو فرصت نہیں رہی

آتے نہیں ہیں شعر جو اڑتے ہوئے میاں

شاید تِرے خیال میں طاقت نہیں رہی

کانٹوں سے زخم کھائے ہیں اتنے کہ اب ہمیں

پھولوں کو چومنے کی بھی حسرت نہیں رہی

پھر یوں ہوا کہ سارا ہی نقشہ بدل گیا

پھر یوں ہوا کہ کوئی حکومت نہیں رہی

اتنا سا فرق ہے کہ احساس مٹ گیا

ایسا نہیں کہ آج مصیبت نہیں رہی

ہر شخص اپنے آپ میں جب قید ہو گیا

اب کالے پانیوں کی ضرورت نہیں رہی

شاہد رحمان