اس نے تھانے میں رپٹ کچھ ایسی لکھوائی کہ بس

نمکینیات

 اس نے تھانے میں رپٹ کچھ ایسی لکھوائی کہ بس 

پھر پولیس نے کی مِری ایسی پذیرائی کہ بس 

یہ پولیس والے کسی کے بھی سگے ہوتے نہیں 

ان کو رشوت سے ملے ہے وہ توانائی کہ بس 

نوکری مل جائے چاہے سیلری تھوڑی ہو کم 

ہاں مگر اوپر سے وہ انکم ہو بالائی کہ بس 

میں نے بیگم سے کہا؛ ہوں گے یہ بچے کب تلک 

بولی جب تک اپنے منہ سے کہہ نہ دے دائی کہ بس 

آج کل کردار کا معیار بھی دولت سے ہے 

اتنی سستی ہو گئی دستار و دانائی کہ بس 

ہیں بظاہر سب سیاستداں وطن کے خیر خواہ 

اور بہ باطن اس قدر دولت کے شیدائی کہ بس 

جسم پر نشتر کوئی بھی سوٹ فٹ آتا نہیں 

ہو گئی ہے توند کی کچھ ایسی گولائی کہ بس 

نشتر امروہوی

نشتر امروہی