ایک تو عشق کی تقصیر کئے جاتا ہوں

 ایک تو عشق کی تقصیر کیۓ جاتا ہوں

اس پہ میں پیروئ میر کیۓ جاتا ہوں

یعنی تصویرِ زماں پر ہے تصرّف اتنا

دیکھتا جاتا ہوں، تحریر کیۓ جاتا ہوں

معذرت گھر کے چراغوں سے کروں گا کیسے

میں جو تاخیر پہ تاخیر کیۓ جاتا ہوں

باغباں! تجھ سے تو میں داد طلب ہوں بھی نہیں

پیڑ سُنتے ہیں، میں تقریر کیۓ جاتا ہوں

یہ علاقہ نہ ہو دریا کی عملداری میں

میں جہاں ناؤ کو زنجیر کیۓ جاتا ہوں

آخرش خاک اُڑا کر سرِ راہے دل کی

ایک دنیا کو میں دلگیر کیۓ جاتا ہوں

اس کی بُنیاد میں اک خام خیالی ہے نعیم

شہر جو خواب میں تعمیر کیۓ جاتا ہوں

نعیم گیلانی