اوج پر جب کمال تھا میرا

 اوج پر جب کمال تھا میرا

وہی وقتِ زوال تھا میرا

تیری تصویر ہی دِِکھاتا تھا

آئینہ بے مثال تھا میرا

سوچتی ہوں عجیب لگتا ہے

بن تِرے لمحہ سال تھا میرا

دل لگی بھی لگی تھی یوں دل کو

رقص میں بال بال تھا میرا

میں تجھے کیسے بھول پاؤں گی

ایک مشکل سوال تھا میرا

رہتی ہوں میں تیرے خیالوں میں

یہ بھی شاید خیال تھا میرا

تیری راہوں میں پھر بھی چلتی رہی

آنکھ نم، دل نڈھال تھا میرا

کر دیا حادثات نے پتھر

ورنہ چلنا محال تھا میرا

آنکھ ٹھہری ہے اک ستارے پر

چاہتی تو ہلال تھا میرا

دیکھتا جو بھی دیکھتا جاتا

میں غزل، وہ غزال تھا میرا

رقیہ غزل