حمد باری مری زباں پر ہے

عارفانہ کلام حمدیہ و نعتیہ کلام

حمدِ باری مِری زباں پر ہے

وجد طاری مری زباں پر ہے

دم بدم لا الٰہَ الا اللہ

ذکر جاری مری زباں پر ہے

ہے تصور میں روضۂ اطہر

نعت پیاری مری زباں پر ہے

نعت گوئی مرا شعار ہوئی

کس نے واری مری زباں پر ہے

ذکر پیاروں کا، چار یاروںؓ کا

باری باری مری زباں پر ہے

حرفِ مطلب ادا نہیں ہوتا

عرض بھاری مری زباں پر ہے

صبرِ جانکاہ میرے دل میں ہے

شکرِ باری مری زباں پر ہے

شب کا پچھلا پہر ہے اور نفیس

آہ و زاری مری زباں پر ہے

نفیس الحسینی​