کسی نے ہاتھ یوں تھاما ہوا ہے

 کسی نے ہاتھ یوں تھاما ہوا ہے

سفر کا حوصلہ پیدا ہوا ہے

نجانے رہ گیا ہے کون پیچھے

ابھی تک قافلہ ٹھہرا ہوا ہے

بہت دن ہو گئے ہیں یاد کرتے

بہت دن سے کوئی بھولا ہوا ہے

تسلی دینے والے ہونٹ چُپ ہیں

دعا کا سلسلہ ٹوٹا ہوا ہے

ہمارے زخم تو بھرتے رہیں گے

تمہارا رنگ کیوں اُترا ہوا ہے

اسے کوئی نہیں جو روک پائے

ہمیں اک بات نے روکا ہوا ہے

اسے کوئی منائے بھی تو کیسے

جو اپنے آپ سے رُوٹھا ہوا ہے

کئی پیغام ہیں اگلے برس کے

کسی نے پھول بھی بھیجا ہوا ہے

شہباز خواجہ