غمِ دنیا کو تِرے غم کا بدل کہتے ہوئے
رو پڑا آج میں کانٹوں کو کنول کہتے ہوئے
بس سہولت سی ہے اک کام چلانے کے لیے
خاک ہم سمجھیں ابد اور ازل کہتے ہوئے
رفتگاں، دامنِ دل کھینچتے رہتے ہیں مِرا
وقفۂ نقل مکانی کو اجل کہتے ہوئے
زیست کے کتنے تقاضوں کو فراموش کیا
سب مسائل کا تِری دید کو حل کہتے ہوئے
میں تو الہام کا ہونے لگا قائل جاذب
خود فراموشی کے عالم میں غزل کہتے ہوئے
اکرم جاذب
No comments:
Post a Comment