عارفانہ کلام نعتیہ کلام
رُوئے حضرتؐ سے اگر نور نہ پایا ہوتا
دونوں عالم میں اندھیرا ہی اندھیرا ہوتا
یوسفؑ مصر میں سب کچھ سہی لیکن اک بار
اے زلیخا مِرے یوسف کو بھی دیکھا ہوتا
خیر سے امتِ عاصی کی شفاعت کر لی
ورنہ کیا جانیے کیا حشر ہمارا ہوتا
عرش پہ خالقِ افلاک کے مہمان ہوئے
کیوں نہ دنیا سے بلند آپؐ کا پایا ہوتا
شاهِ لولاکﷺ کے دم سے ہے نمودِ ہستی
وہﷺ اگر خلق نہ ہوتے تو یہاں کیا ہوتا
طور پہ جا کر پریشان ہوئے مفت کلیمؑ
اس سے یثرب میں چلے آتے تو اچھا ہوتا
مدح خوانِ شہِ لولاکﷺ بنایا حق نے
اور کیا اس زیادہ مِرا رُتبہ ہوتا
ثانئ احمدﷺ مختار کا امکان نہیں
ایسا ہوتا تو ضرور آپؐ کا سایہ ہوتا
افسر اللہ نے بخشی تھی اگر طبعِ سلیم
عمر کو نعت محمدﷺ میں گزارا ہوتا
افسر صدیقی
No comments:
Post a Comment