وہی نہ ملنے کا غم اور وہی گلہ ہو گا

 وہی نہ ملنے کا غم اور وہی گِلا ہو گا

میں جانتا ہوں مجھے اس نے کیا لِکھا ہو گا

کواڑوں پر لِکھی ابجد گواہی دیتی ہے

وہ ہفت رنگی کہیں چاک ڈھونڈھتا ہو گا

پرانے وقتوں کا ہے قصر زندگی میری

تمہارا نام بھی اس میں کہیں لکھا ہو گا

چبھن یہ پیٹھ میں کیسی ہے مڑ کے دیکھ تو لے

کہیں کوئی تجھے پیچھے سے دیکھتا ہو گا

گلی کے موڑ سے گھر تک اندھیرا کیوں ہے نظام

چراغ یاد کا اس نے بجھا دیا ہو گا

شین کاف نظام