اگر اے نسیم سحر ترا ہو گزر دیار حجاز میں

عارفانہ کلام نعتیہ کلام

اگر اے نسیمِ سحر تِرا ہو گزر دیارِ حجاز میں

مِری چشمِ تر کا سلام کہنا حضورِ بندہ نواز میں

تمہیں حدِ عقل نہ پا سکی فقط اتنا حال بتا سکی

کہ تم ایک جلوۂ راز تھے جو نہاں ہے رنگِ مجاز میں

نہ جہاں میں راحتِ جاں ملی، نہ متاعِ امن و اماں ملی

جو دوائے دردِ نہاں ملی، تو ملی بہشتِ حجاز میں

عجب اک سُرور سا چھا گیا مِری روح و دل میں سما گیا

تِرا نام ناز سے آ گیا مِرے لب پہ جب بھی نماز میں

کروں نذر نغمۂ جاں فزا میں کہاں سے اخترِ بے نوا

کہ سوائے نالۂ دل نہیں مِرے دل کے غمزدہ ساز میں

اختر شیرانی