مقامِ عشق ذرا سا بدل دیا ہم نے
جنوں وہی رہا صحرا بدل دیا ہم نے
اتارا تو تھا کسی آئینے میں اپنا وجود
پھر اس کے بعد یہ چہرہ بدل دیا ہم نے
چھپا لیے در و دیوار تازہ بیلوں میں
کچھ ایسے نقشہ مکاں کا بدل دیا ہم نے
شبِ سیاہ سے گھبرا کے سو لیے دن کو
تمہارے خواب کا رستہ بدل دیا ہم نے
نکال لائے اندھیروں سے روشنی کی کرن
چراغ ٹوٹا ہوا تھا بدل دیا ہم نے
تمہاری سڑکوں پہ اتنے شجر لگائے ہیں
تمہارے شہر کا نقشہ بدل دیا ہم نے
بدن کی قید سے اکتائے اس قدر احسان
سو اپنا پہلا لبادہ بدل دیا ہم نے
احسان گھمن
No comments:
Post a Comment