تمام پُرسے سنبھال رکھے ہیں تعزیانہ پڑا رہے گا
کہ آنکھ روئے گی تازہ غم کو مگر پرانا پڑا رہے گا
دیارِ ہجرت سے لوٹ آئیں نہ جانے کب اس چمن کی چِڑیاں
ہمارے دیوار و در پہ رکھا یہ آب و دانہ پڑا رہے گا
ہر ایک دھڑکن ہمارے دل کی تمہاری قربت میں خرچ ہوگی
تمہارے آنے پہ قفل کھولیں گے سب خزانہ پڑا رہے گا
تمہاری بستی میں عشق زادے کی لوگ برسوں مثال دیں گے
وہ نہر والے کا، دشت والے کا، سب فسانہ پڑا رہے گا
کبھی جو فرصت ملے تو ماں کے لرزتے ہاتھوں کو چوم لینا
کہ روز و شب پھر تمہارے پیروں میں اک زمانہ پڑا رہے گا
عاطف جاوید عاطف
No comments:
Post a Comment