دکھ نہیں اس بات کا شاعر نہ ہم مانے گئے

 دُکھ نہیں اس بات کا شاعر نہ ہم مانے گئے

دکھ تو یہ ہے بزم میں ہم اجنبی جانے گئے

دور تک اس کی محبت کے جو افسانے گئے

لوگ سارے شہر کے تھے سنگ برسانے گئے

کس قدر چھائی ہوئی تھی چار سُو افسردگی

کس لیے اس بزم میں ہم دل کو بہلانے گئے

شہر بھر کی انگلیاں کیوں اٹھ گئی تھیں جب کبھی

ہم تِری دیوار کے سائے میں سستانے گئے

ڈھونڈنے روشن ستارہ کوئی اپنے بخت کا

ہم نجومی کو بھی اپنا ہاتھ دکھلانے گئے

اپنی آنکھوں میں لیے وہ روشنی ہی روشنی

دار تک دیکھو کہ کیسے کیسے دیوانے گئے

ڈھونڈنے اپنے دلوں کے واسطے صبر و قرار

مسجدوں میں ہم گئے جب لوگ مے خانے گئے

پاؤں سے لپٹی تھی ایسے خانہ ویرانی کی ریت

ہم وہ وحشی تھے، ہمارے ساتھ ویرانے گئے

میں کہ فرحت زیست کی ان الجھنوں میں قید تھی

اپنے اپنے مسئلے جب لوگ سُلجھانے گئے

فرزانہ فرحت