کٹیا جو اک فقیر کی کم تر دکھائی دے

 کٹیا جو اک فقیر کی کم تر دکھائی دے

دیکھو تو قصرِ شاہی سے بڑھ کر دکھائی دے

اس بدنصیب سا بھی کوئی بد نصیب ہے

جس کو زمینِ عشق بھی بنجر دکھائی دے

جس کی تلاش ہو وہ دِکھائی نہ دے کہیں

جس کو نہ دیکھنا ہو وہ اکثر دکھائی دے

ممکن ہے ایک روز وہ آئے مِرے بھی گھر

ممکن ہے ایک روز یہ گھر، گھر دکھائی دے

اتنی سکت نہیں ہے کہ اندر ہی جھانک لوں

روزن سے جھانکتا ہوں کہ باہر دکھائی دے

لگتا ہے یہ بھی میر کی غزلوں کا ہے اثر

مجھ کو جو چاند میں پری پیکر دکھائی دے

یارو! جمالِ یار بھی آنکھوں سے دیکھنا

آنکھوں بغیر دیکھو کہ بہتر دکھائی دے

امتیاز انجم