اجنبی شہر لگے صورتِ زنداں مجھ کو
لے چل اے موج ہوا سوئے بیاباں مجھ کو
رات آئے تو تیرے درد کی رُت بھی آئے
چاند نکلے تو کرے دل بھی پریشاں مجھ کو
میں بھی بجھنے کو ہوں اے قتل گہِ شہر مگر
یاد رکھے گی تیری شامِ غریباں مجھ کو
لوٹ آیا ہوں نصیبِ غمِ یاراں بن کر
راس آئی نہ ہوائے غمِ دوراں مجھ کو
تُو کہ دریا پہ برستا ہے نہ صحراؤں میں
اپنی منزل تو بتا ابرِ گریزاں مجھ کو
یوں بھی رُسوا تھی بہت خلوت دل کی خواہش
تیری چاہت نے کیا اور نمایاں مجھ کو
اپنا گھر کتنا ہی ویراں ہو پھر اپنا گھر ہے
بسترِ خاک لگے تختِ سلیماں مجھ کو
جانتا ہوں میں خد و خال کی قیمت محسن
آئینہ کر نہ سکے گا کبھی حیراں مجھ کو
محسن نقوی
No comments:
Post a Comment