ناگہاں دردِ محبت کا بیاں ہو جانا
کیا غضب ہے مِرے اشکوں کا زباں ہو جانا
برق گرتی ہے نشیمن پر تو پروا کیا ہے
اپنا شیوہ نہیں سر گرمِ فغاں ہو جانا
کوئی کیا جانے کہ بے وجہ فروغِ ہستی
آتشِ عشق کا رگ رگ میں نہاں ہو جانا
دہر میں قیمتِ انساں نہ گرا دے اک دن
اس قدر جنسِ محبت کا گراں ہو جانا
جادۂ عشق کی اک یہ بھی حسیں منزل ہے
اپنے اوپر کسی دلبر کا گماں ہو جانا
سوزِ کامل کا تقاضا تو یہ ہے پروانو
اپنی ہی آگ میں خود شعلہ بجاں ہو جانا
مژدہ اک تازہ بہار آنے کا ریحانی
صحنِ گلزار کا یوں نذرِ خزاں ہو جانا
ہینسن ریحانی
No comments:
Post a Comment