اِذن ملتے ہی درِ میر سے نکلا اک دن
عشق امکان کی تصویر سے نکلا اک دن
رسیاں ڈال کے گردن سے مجھے کھینچا گیا
پاؤں کیا حلقۂ زنجیر سے نکلا اک دن
میں وہاں دیر سے پہنچا تھا زرِ چشم لیے
طشتِ خورشید بھی تاخیر سے نکلا اک دن
عکس آئینۂ دل تھا سو بغاوت کے سبب
سرِ شب خواہشِ تعمیر سے نکلا اک دن
رنگ آہنگِ تمنا سے ہوا تھا قائم
اور منظر مِری تحریر سے نکلا اک دن
سلسلہ وار شفق مجھ پہ اتاری ہوئی تھی
اس لیے طرزِ اساطیر سے نکلا اک دن
عقیل ملک
No comments:
Post a Comment