ہمارا خمیر مٹی ہمارا اخیر مٹی

  مٹی

ہم آگ، پانی، ہوا کے پیکر

مگر ہمارا خمیر مٹی

غرور و کِذب و ریا کے اڑتے ہوئے غباروں میں 

آسمانوں کو چھو رہے ہیں

مگر ہمارا اخیر مٹی

وہ اپنے بچپن کے کھیل مٹی، گھروندے مٹی

وہ جگنووں اور تتلیوں کی تلاش مٹی

کہ جن کو کھو کر رہے گی اپنی اداس مٹی

وہ رنگ و خوشبو کے باب مٹی

وہ تیز بارش کے پانیوں میں بگڑتے بنتے حباب مٹی

وہ کاغذی کشتیوں کے ملاح اور ان کے چناب مٹی

وہ چاند چہرے، شباب مٹی

ہر ایک غنچہ گلاب مٹی

وہ قربتوں کے سراب مٹی

وہ ہجرتوں کے عذاب مٹی

مِری نظر آسماں سے آگے

مگر مِرا انتخاب مٹی

سبھی ہیں دامن گریز مجھ سے

ہے میری کتنی خراب مٹی

مگر وہ مٹی کہ 

جس پہ نازاں ہے آسمان و زمیں کی مٹی

وہ اور مٹی

میں اور مٹی

وہ حرفِ حق کا نزول مٹی

میں اُس کے قدموں کی دُھول مٹی

وہ آدمی کا وقار مٹی

میں پُر خطا، شرمسار مٹی

وہ مٹی جو کہ خلوص و صدق و صفا کے نم سے گندھی ہوئی تھی

وفا و اُنس و حیا کی خوشبو سے جس کا پیکر مہک رہا تھا

کال مٹی تھی جس کی عظمت پہ نوریوں کو بھی رشک آیا

وہ رفعتوں کی امین مٹی

کہ جس کے نعلین چومنے کو ہر اک بلندی ترس رہی تھی

عروجِ آدم کی خاطر اس نے زمیں کو مسکن بنا لیا تھا

وہ مٹی افلاک نے بھی دیکھی

کہ جس نے اڑ کر

عدو کی بینائی سلب کر لی

اسی کے نم نے جھلستے صحرا میں پھول ایسے کھلا دئیے ہیں

کہ جن کی خوشبو سے سارا عالم مہک رہا ہے

مِرے خدا کی حبیب مٹی، جو رازدارِ حروفِ کُن ہے

وہ مٹی جس پر ہر ایک ساعت

خدائے برتر اور اس کے کروبیاں کروڑوں درود بھیجیں

وہ خوش سخن، خوش خصال مٹی

لطافتوں سے نہال مٹی

وہ خوبرو، پُر جمال مٹی

وہ بے بدل بے، بے مثال مٹی

وہ دلربا، دل پذیر مٹی، محبتوں کی سفیر مٹی

وہ میرے بدرالدجیٰ کی مٹی

جو میری جیسی نہ جانے کتنی ہی ظلمتوں کو اجالتی ہے

عرفان عرفی