ایک پل بھی جدا درد سے ہونے نہیں دیتا

 ایک پل بھی جدا درد سے ہونے نہیں دیتا

راتوں کو تصور تِرا سونے نہیں دیتا

دل تِرے تغافل پہ بھی مسرور ہے شاید

جی کھول کے اکثر مجھے رونے نہیں دیتا

سورج تِری یادوں کا چمکتا ہے کچھ ایسے

دامن مجھے اشکوں سے بھگونے نہیں دیتا

کیوں دل پہ تِرا درد چھڑکتا نہیں شبنم

روٹھے ہوئے بچے کو کھلونے نہیں دیتا

سفاک ہے کتنا شب فرقت کا اندھیرا

پلکوں پہ ستارے بھی پرونے نہیں دیتا

جس شخص پہ اُتری ہیں میرے پیار کرنیں

وہ مجھ کو اندھیروں میں بھی کھونے نہیں دیتا

آنکھوں سے برستا ہوا بادل مجھے جرار

دامن کا کوئی داغ بھی دھونے نہیں دیتا

آغا جرار