نیا اک زخم ہم کھائے ہوئے ہیں

 نیا اک زخم ہم کھائے ہُوئے ہیں

اسی خاطر تو کُملائے ہوئے ہیں

ہمارے عمر کٹتی جا رہی ہے

سو ہم بھی شام کے سائے ہوئے ہیں

ہمیں مالِ غنیمت ہی سمجھ لو

تمہارے ہاتھ ہم آئے ہوئے ہیں

دلِ کمبخت نے مروا دیا ہے

تمہارے​ کس لیے ہائے، ہوئے ہیں

کفن جچتا نہ تھا، سو اس لیے ہم

لباسِ زیست پہنائے ہوئے ہیں

حسینیؑ سر تو نیزے پر ڈٹا ہے

سپاہِ شام گھبرائے ہوئے ہیں

حماد! اس شہر سے دل اٹھ گیا ہے

سو اب مجنوں کے ہمسائے ہوئے ہیں

حماد یونس