جسم نازک ہے اور آہنگ بھی ایسا ہے کہ بس

 جسم نازک ہے اور آہنگ بھی ایسا ہے کہ بس

پیرہن تنگ ہے اور تنگ بھی ایسا ہے کہ بس

شاعری تجھ کو مبارک کہ تِرے گالوں پر

میر کا رنگ ہے اور رنگ بھی ایسا ہے کہ بس

غم تو کہتا ہے کہ میں لب نہ سیوں بین کروں

دل مگر سنگ ہے اور سنگ بھی ایسا ہے کہ بس

ہجر وہ داغ جو وصلت بھی نہیں دھو سکتی

یوں سمجھ زنگ ہے اور زنگ بھی ایسا ہے کہ بس

کود جائے کسی دریا میں تو حیرت کیسی

خود سے وہ تنگ ہے اور تنگ بھی ایسا ہے کہ بس

اِک تو ہم لوگ تجسس کے پرانے رسیا

اس پہ یہ عالمِ نیرنگ بھی ایسا ہے کہ بس

زود گوئی کا ہنر اپنی جگہ ہے کاشر

قافیہ تنگ ہے اور تنگ بھی ایسا ہے کہ بس

شوزیب کاشر