درمیاں کب اٹک گئی ہو گی
آہ سُوئے فلک گئی ہو گی
یہ فضا کیوں بہک گئی ہو گی
اُس کی چادر سرک گئی ہو گی
جب نظر اُس تلک گئی ہو گی
دل پہ بجلی کڑک گئی ہو گی
ہے ترا انتظار مدت سے
دل میں امید تھک گئی ہو گی
"یہ دھواں سا کہاں سےاٹھتا ہے"
آگ دل میں بھڑک گئی ہو گی
پھول پر اُس نے ہونٹ رکھے ہیں
جان، شبنم، چھڑک گئی ہو گی
اسپِ دل بے لگام ہو گیا تھا
زین کب کی، ڈھلک گئی ہو گی
حسرتِ دل، مثالِ طفلِ صغیر
اُس کی جانب ہمک گئی ہو گی
میری ہجرت کے بعد، بستی سے
وہ چمک، وہ دمک گئی ہو گی
آج آئی نہیں چمن میں صبا
دشت میں ہی بھٹک گئی ہو گی
خود سے سرگوشیوں میں تھا مصروف
کیسے اُس تک بھنک گئی ہوگی؟
کیوں خجل بلبل و گلاب ہوئے؟
یہ صبا یک بیک گئی ہو گی
اُس کےکوچے میں میری روح وسیم
دیکھنے، اک جھلک گئی ہو گی
وسیم عباس حیدری
No comments:
Post a Comment