اک ایک حرف ہے معجز نما درودوں کا

 عارفانہ کلام حمد نعت منقبت سلام

اک ایک حرف ہے معجز نما درودوں کا

زہے یہ وِرد خوشا سلسلہ درودوں کا

ہوائیں مغفرت آثار ہوتی جاتی ہیں

رواں ہے سُوئے نبیؐ، قافلہ درودوں کا

ہے لفظ لفظ شفاعت بدوش و خیر بدست

چہک رہا ہے لہو میں مزہ درودوں کا

نظر فروز ہیں خیرالانامؐ کے خد و خال

ہے جب سے پیشِ نظر آئینہ درودوں کا

تصورات ہیں سیرِ مدینہ سے شاداب

خوشا! وظیفہ بہجت فزا درودوں کا

عجیب سرمدی سرشاریوں میں رہتا ہے

ہوا ہے جب سے یہ دل آشنا درودوں کا

ہر ایک لفظ ہے مشکل کُشا و لطف افزا

خوشا! وسیلۂ رحمت نما، درودوں کا

رُکیں نہ ایک بھی لمحہ درود خوانی سے

اثر جو دیکھ لیں اہلِ وِلا، درودوں کا

لبِ ریاض سے گوشِ شہِ ریاض تلک

جہانِ نُور ہے پھیلا ہوا درودوں کا

ریاض مجید