ڈوب جاتا تو کسی اور طرف سے آتا

 ڈوب جاتا تو کسی اور طرف سے آتا

جگمگاتا تو کسی اور طرف سے آتا

چاند کا آنا ضروری تھا مِرے ملنے کو

ابر چھاتا تو کسی اور طرف سے آتا

وہ ستارہ سا دبے پاؤں چلا آیا ہے

جھلملاتا تو کسی اور طرف سے آتا

خیر گزری کہ اسے روک لیا تھا میں نے

لوٹ جاتا تو کسی اور طرف سے آتا

طے ہوا یہ تھا کہ میں پچھلی گلی سے آتی

وہ جو آتا تو کسی اور طرف سے آتا

ہاں یہی راہ تھی آسان اسے آنے میں

ہچکچاتا تو کسی اور طرف سے آتا

یاد تھے اس کو سبھی موڑ مِرے رستے کے

بُھول جاتا تو کسی اور طرف سے آتا

رفعت ناہید