کچھ کرم ہم پہ برملا تو ہوئے

کچھ کرم ہم پہ برملا تو ہوئے

بندگانِ خدا، خدا تو ہوئے

یاں تو رد عمل ہی تھا ناپید

کم سے کم لوگ کچھ خفا تو ہوئے

نہ سہی ہم چمن میں موجِ صبا

دشت و در کے لیے ہوا تو ہوئے

نہ سہی ہم افق پہ رنگِ شفق

تابشِ شعلۂ حنا تو ہوئے

خیر ہم کچھ نہ ہو سکے، لیکن

کچھ نہ ہونے سے آشنا تو ہوئے

کارِ دنیا اب اور کیا سیکھیں

مسکراتے ہوئے خفا تو ہوئے

دوستوں کی طرح ملے نہ، مگر

دوستوں کی طرح جدا تو ہوئے

خیر ہو تیرے جاں نثاروں کی

لوگ شرمندۂ جفا تو ہوئے

ہم زیاں کوش زندگی کے طفیل

خوگرِ ترکِ مدعا تو ہوئے

دے کے صدیوں کے انتظار کا غم

چند لمحے گریز پا تو ہوئے

سرِ یومِ حسابِ ذات سحرؔ

ہم ہی اپنے لیے سزا تو ہوئے

سحر انصاری