ہمسفر تھم تو سہی دل کو سنبھالوں تو چلوں

 ہمسفر تھم تو سہی دل کو سنبھالوں تو چلوں

منزل دوست پہ دو اشک بہا لوں تو چلوں

ہر قدم پر ہیں مرے دل کو ہزاروں الجھاؤ

دامنِ صبر کو کانٹوں سے چھڑا لوں تو چلوں

مجھ سا کون آئے گا تجدیدِ مکارم کے لیے

دشتِ امکاں کی ذرا خاک اڑا لوں تو چلوں

بس غنیمت ہے یہ شیرازۂ لمحات بہار

دھوم سے جشنِ خرابات منا لوں تو چلوں

پاؤں زخمی ہوئے اور دور ہے منزل واصفؔ

خونِ اسلاف کی عظمت کو جگا لوں تو چلوں

واصف دہلوی