یہ شور مصرعۂ اولیٰ کے بعد کم پڑ جائے
میں شعر ایسا سناؤں کہ داد کم پڑ جائے
کُمک دماغ کی ملتی رہے کہ برسرِ ہجر
خدانخواستہ دلِ نامراد کم پڑ جائے
کچھ اس لیے بھی میں پچھلی صفوں میں شامل ہوں
کسے خبر ہے کہیں ایک آدھ کم پڑ جائے
سحر کا نام ہی لیتے رہو زباں والو
سیاہ رات کا کچھ اعتماد کم پڑ جائے
یہاں تلک تو وسائل میں خود کفیل ہوں میں
یہاں تلک کہ مجھے تیری یاد کم پڑ جائے
میں خواب خواب میسر رہوں گا دنیا میں
کسی بھی وقت کوئی خواب زاد کم پڑ جائے
مدثر عباس
No comments:
Post a Comment